दिलीप पाण्डे रौतहट । प्रारम्भिक चरणमा देखिएको ढिलाइपछि पूर्वाधार विकास कार्यालय रौतहटले विकास योजनालाई तीव्रता दिने स्पष्ट संकेत देखाएको छ । चालू आर्थिक वर्षको फागुन मसान्तसम्म पुँजीगत खर्च १५ प्रतिशतमा सीमित रहे पनि अधिकांश योजनाको प्रक्रियागत तयारी सम्पन्न हुने चरणमा पुगेको कार्यालयले जनाएको छ ।
कार्यालय प्रमुख दिपक कुमार मिश्रका अनुसार प्रदेशस्तरको नीतिगत अन्योलका कारण सुरुआती महिनामा योजना कार्यान्वयन प्रभावित भए पनि अहिले टेन्डर, समन्वय र प्राविधिक तयारीका काम द्रुत रूपमा अघि बढिरहेका छन् । उहाँका अनुसार यसले आगामी महिनामा खर्च दर र कार्य प्रगति दुवैमा सुधार ल्याउने आधार तयार गरेको छ ।
चालू आर्थिक वर्षका लागि २ अर्ब १३ करोड रुपैयाँ बजेटसहित ६०० योजना स्वीकृत गरिएकोमा ठूला योजनाहरू क्रमश टेन्डर प्रक्रियामा प्रवेश गरिरहेका छन् । २५ लाखभन्दा माथिका योजनामध्ये आधाभन्दा बढी प्रक्रिया अगाडि बढिसकेको छ भने बाँकी योजनामा सम्बन्धित निकायसँग आवश्यक समन्वय भइरहेको छ ।
बहुवर्षीय योजनामा समेत उल्लेख्य प्रगति देखिएको कार्यालयले जनाएको छ । ६० मध्ये ४० योजना कार्यान्वयनमा छन् भने बाँकी योजनामा डिपिआर निर्माण र स्रोत सुनिश्चितताको काम अन्तिम चरणतर्फ उन्मुख छ ।
कार्यालयले साना तथा मध्यम योजनामा देखिएको ढिलाइ न्यूनीकरण गर्न स्थानीय तह र उपभोक्ता समितिसँग समन्वयलाई अझ सुदृढ बनाएको छ । साथै पारदर्शिता, गुणस्तर र प्रभावकारितालाई केन्द्रमा राख्दै अनुगमन संयन्त्रलाई सक्रिय बनाइएको छ । कार्यालयका अनुसार अबको अवधिमा योजनाहरू कार्यान्वयन चरणमा प्रवेश गर्ने क्रम बढ्दै जानेछ र यसले समग्र विकासलाई गतिशील बनाउने विश्वास लिइएको छ ।
