रौतहट । रौतहटमा अवैध हतियारसहित एक युवक पक्राउ परेका छन् । जिल्ला प्रहरी कार्यालय रौतहटले जारी गरेको प्रेस विज्ञप्ति अनुसार नेपाल–भारत सीमाबाट साना हातहतियार ओसारपसार हुने गरेको विशेष सूचनाका आधारमा प्रहरीले चेकजाँच कडा पारेको थियो ।
बिहिवार बिहानको समयमा बौधिमाई नगरपालिका ७ बंकुलस्थित इट्टा उद्योग नजिक सडकमा प्रहरी टोलीले चेकजाँच गरिरहेको अवस्थामा एक शंकास्पद युवकलाई नियन्त्रणमा लिएको थियो ।
प्रहरीका अनुसार भारतको बिहार राज्य पूर्वी चम्पारण जिल्ला मौवाह ग्रामपंचायत चनारमण टोल बस्ने सनिचर दासका छोरा करिब २० वर्षीय सुर्य कुमार दासलाई रोकी कानुन बमोजिम खानतलासी गर्दा उनको पाइन्टभित्र लुकाइछिपाइ राखिएको अवस्थामा एक थान कटुवा पेस्तोल फेला परेको हो । साथै उनको साथबाट दुईवटा भारतीय सिम प्रयोग गरिएको ओप्पो कम्पनीको मोबाइल फोनसमेत बरामद गरिएको प्रहरीले जनाएको छ ।
बरामद गरिएको पेस्तोल, मोबाइल र पक्राउ परेका युवकलाई नियन्त्रणमा लिई आवश्यक कानुनी प्रक्रिया अघि बढाइएको छ । घटनाबारे थप अनुसन्धान भइरहेको जिल्ला प्रहरी कार्यालय रौतहटले जनाएको छ ।
