रौतहट // रौतहटको गौर नगरपालिका मा अटो तथा इभी (विद्युतीय सवारी) सञ्चालनलाई लिएर विवाद चर्किएको छ । जथाभावी रूपमा यात्रु ओसारपसार भइरहेको भन्दै नगरपालिकाले कडाइ गर्न थालेपछि अटो व्यवसायी र इभी चालकहरू विरोधमा उत्रिएका हुन् ।
सोमबार दिउँसो अटो व्यवसायी संघमा आबद्ध चालकहरूले नगरप्रमुख शम्भु साहसमक्ष आफ्ना गुनासा राखेका थिए । तर मागप्रति सुनुवाइ नभएको आरोप लगाउँदै व्यवसायीहरू आक्रोशित बनेका छन् । समस्या समाधान नभए गौर–चन्द्रपुर सडक खण्ड अवरुद्ध गर्ने चेतावनी समेत दिएका छन् ।
इभी चालक राहुल झाले आफूहरू नगरपालिकालाई कर तिरेरै सवारी सञ्चालन गर्दै आएको दाबी गर्दै आफ्नो आम्दानीमाथि हस्तक्षेप गरिएको गुनासो गरे। अटो व्यवसायी संघका अध्यक्ष सुरेन्द्र साहले यात्रुहरू विभिन्न स्थानका हुने भएकाले सेवा विस्तार आवश्यक रहेको र बिरामी बोक्न समेत रोक लगाइनु अन्यायपूर्ण भएको बताए।
उता नगरप्रमुख शम्भु साहले अव्यवस्थित अटो सञ्चालनका कारण अन्य यातायात व्यवसायी विशेषगरी बस र म्याजिक प्रभावित भएको बताएका छन् । उनका अनुसार पूर्व सहमतिअनुसार गौरभित्र सीमित अटो सञ्चालन गर्नुपर्ने र अन्य रुटका सवारी बसपार्कबाट मात्र चल्नुपर्ने व्यवस्था भए पनि त्यसको उल्लंघन भइरहेपछि नगरपालिकाले नियमन कडा पारेको हो।
गौर–चन्द्रपुर सडक खण्डमा तीनपांग्रे अटो सञ्चालनमा रोक लगाइए पनि नियम उल्लंघन गर्दै ग्रामीण यात्रु ओसार्ने क्रम नरोकिँदा बस व्यवसायीहरू समस्यामा परेको नगरपालिकाको दाबी छ।
