दिलिप पाण्डे रौतहट । रौतहटको प्रादेशिक अस्पताल गौर परिसरमा कर्मचारी आवास भवन निर्माण कार्यको शिलान्यास गरिएको छ ।
शनिबार आयोजित कार्यक्रममा मधेश प्रदेशका मुख्यमन्त्री कृष्ण प्रसाद यादवको प्रमुख आतिथ्य तथा जंगीलाल रायको विशेष उपस्थितिमा भवनको शिलान्यास गरिएको हो ।
मधेश प्रदेश सरकार स्वास्थ्य तथा जनसंख्या मन्त्रालय तथा स्वास्थ्य निर्देशनालयको समन्वयमा अस्पताल परिसरमै सुपरिन्टेन्डेन्ट (प्रशासनिक) तथा कर्मचारी आवासका लागि भवन निर्माण सुरु गरिएको अस्पताल प्रशासनले जनाएको छ ।
निर्माण कार्य PHR/NCB/W/01/2082/083 नम्बरको ठेक्का अन्तर्गत ४७ लाख ९८ हजार ५ सय ७३ रुपैयाँ २६ पैसाको लागतमा हुने भएको छ। उक्त निर्माण कार्यका लागि यहि फागुन २९ गते सम्झौता गरिएको छ भने २०८३ असार १० गतेभित्र निर्माण सम्पन्न गर्ने लक्ष्य राखिएको छ ।
भवन निर्माणको जिम्मेवारी राष्ट्र निर्माण सेवाले पाएको छ ।
अस्पताल परिसरमै कर्मचारी आवास भवन निर्माण भएपछि प्रशासनिक कामकाजलाई थप व्यवस्थित बनाउन सहयोग पुग्ने र स्वास्थ्यकर्मी तथा कर्मचारीहरूको आवास व्यवस्थामा समेत सहजता आउने विश्वास गरिएको छ । कार्यक्रममा अस्पतालका कर्मचारी, स्थानीय जनप्रतिनिधि तथा सरोकारवालाको उपस्थिति रहेको थियो ।
