रौतहट। रौतहटको उत्तरी भेगमा सोमबार राति आएको तीव्र हावाहुरीले किसानका केरा र मकै बालीमा ठूलो क्षति पुर्याएको छ। विशेषगरी चन्द्रपुर नगरपालिकाको खेतीयोग्य जमिनमा लगाइएको बालीमा व्यापक नोक्सानी भएपछि स्थानीय किसान मर्कामा परेका छन्।
पछिल्लो समय केराखेतीको हबको रूपमा परिचित चन्द्रपुर–३ गैडाटार क्षेत्रमा सबैभन्दा बढी असर परेको छ। त्यहाँका किसानहरूको फल्न लागेको केराखेतीमा हावाहुरीले क्षति पुर्याएको छ भने चन्द्रपुरका अन्य स्थानमा लगाइएको मकै बालीसमेत ढलेको छ।
करिब दुई घण्टासम्म चलेको तीव्र हुरीले पाक्नै लागेको अवस्थामा रहेका बालीमा क्षति पुर्याएपछि किसानहरू चिन्तित बनेका छन्। स्थानीय किसान उपेन्द्र गोलेका अनुसार हावाहुरीले धेरैजसो केराका बोटहरू जरैबाट उखेलेको छ भने केही बीचमै भाँचिएर ढलेका छन्।
पसाएर पाक्ने तयारीमा रहेको केरा नष्ट भएपछि किसानहरूको वर्षौँदेखिको मेहनत क्षणभरमै नोक्सानमा परिणत भएको छ।
प्राकृतिक विपत्तिका कारण किसानहरूले हरेक वर्षजसो क्षति व्यहोर्दै आए पनि सम्बन्धित निकायबाट पर्याप्त सहयोग नपाउँदा उनीहरूको समस्या झन् बढ्दै गएको स्थानीयको गुनासो छ।
