दिलीप पाण्डे रौतहट । रौतहट निर्वाचन क्षेत्र नं. १ बाट प्रतिनिधिसभा सदस्य पदका उम्मेदवार अजय कुमार गुप्ताको चुनावी अभियानलाई तीव्र बनाउँदै जनसम्पर्कमा सक्रिय देखिएका छन् । लामो समयदेखि राजनीतिमा सक्रिय रहँदै आएका गुप्ताले स्थानीय विकास, सुशासन र जनताको आवाजलाई आफ्नो प्रमुख एजेन्डा बनाएका छन् । हिजो पनि जनताको साथमा थिएँ आज पनि छु भन्ने सन्देशसहित उनले निर्वाचन क्षेत्रका विभिन्न स्थानमा भेटघाट, छलफल तथा अन्तरक्रिया कार्यक्रममार्फत मतदातासँग प्रत्यक्ष संवाद गरिरहेका छन् । स्थानीय समस्याको दीर्घकालीन समाधानका लागि राष्ट्रिय तहमा प्रभावकारी भूमिका आवश्यक रहेको उनको भनाइ छ ।
समर्थकहरूका अनुसार जनतासँग नजिक रहने र निरन्तर उपस्थित रहने कार्यशैलीका कारण गुप्ताप्रति जनविश्वास बलियो बन्दै गएको छ । आगामी निर्वाचनलाई लक्षित गर्दै उनले स्थायित्व र विकासका लागि आफ्नो पक्षमा मतदान गर्न मतदातासँग आग्रह गरेका छन् । नेकपा एमालेका केन्द्रीय सदस्य तथा रौतहटका इन्चार्जसमेत रहेका गुप्ताले अभियानलाई थप सशक्त बनाउने बताएका छन् ।
