रौतहट । जिल्ला प्रशासन कार्यालय रौतहटले निर्वाचन अवधिमा बालबालिकालाई कुनै पनि राजनीतिक तथा चुनावी गतिविधिमा प्रयोग नगर्न नगराउन औपचारिक सूचना जारी गरेको छ।
कार्यालयले सार्वजनिक गरेको सूचनामा बालबालिका राष्ट्रको भविष्य भएकाले उनीहरूलाई राजनीतिक प्रभाव, जोखिमपूर्ण गतिविधि तथा मानसिक र शारीरिक शोषणबाट जोगाउनु राज्य, राजनीतिक दल र सम्पूर्ण समाजको साझा दायित्व भएको उल्लेख गरिएको छ। संविधान र बालअधिकारसम्बन्धी कानुनी व्यवस्थाले पनि बालबालिकालाई राजनीतिक प्रयोजनका लागि प्रयोग गर्न नपाइने स्पष्ट व्यवस्था गरेको प्रशासनको भनाइ छ।
आगामी प्रतिनिधि सभा सदस्य निर्वाचन प्रक्रियालाई बालमैत्री, मर्यादित र कानुनसम्मत बनाउन सबै दल, उम्मेदवार तथा सरोकारवालालाई सचेत गराउँदै बालबालिकाको प्रयोग नगर्न निर्देशन दिइएको छ । सूचना सहायक प्रमुख जिल्ला अधिकारीको हस्ताक्षरसहित जारी गरिएको हो।
