राैतहट । रौतहटको नेपाल–भारत सीमा क्षेत्रमा सशस्त्र प्रहरी बल नेपालले शंकास्पद भारतीय नोट सहित दुई जनालाई पक्राउ गरेको छ।
नेपाल सीमा सुरक्षा गुल्म हेड क्वाटर गौर रौतहटबाट खटिएको सशस्त्र प्रहरी टोलीले नियमित जाँचका क्रममा भारतीय नोट सहित दुई जनालाई पक्राउ गरिएको सशस्त्र प्रहरी बल नेपाल गुल्म गौरका सशस्त्र प्रहरी नायब उपरीक्षक प्रेमसागर विष्टले जानकारी दिनु भएको छ ।
मंगलवार गौर नगरपालिका वडा नं. २ महादेवपट्टीस्थित सीमा नाकामा भारतबाट नेपालतर्फ आउँदै गरेको बिआर ३० एएफ ५७३१ नम्बरको मोटरसाइकल रोकी चेकजाँच गर्दा भारतीय रुपैया दुई हजार ५ सय बराबरका नक्कली जस्तो देखिने नोट फेला परेको सशस्त्र प्रहरीले जनाएको छ। बरामद नोटमध्ये ५०० दरको १ थान र २०० दरका १० थान रहेका छन्।
नक्कली नाेट सहित पक्राउ पर्नेहरूमा भारतको बिहार राज्य, सितामढी जिल्ला पर्सौनी बस्ने अन्दाजी ४२ वर्षीय राकेश कुमार साह र सितामढी सिभवर परिषद–४ बस्ने अन्दाजी ३० वर्षीय बिक्रम कुमार पासवान रहेका छन्।
उनीहरूको साथबाट सक्कली भारु १७७ नगद,माेटरसाइकल तथा दुई थान एन्ड्रोइड मोबाइलसमेत बरामद गरिएको छ। दुवै जनालाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय रौतहट पठाइएको सशस्त्र प्रहरी बलले जनाएको छ।
