दिलिप पाण्डे रौतहट । रौतहटको चन्द्रपुर नगरपालिका क्षेत्रमा भइरहेको अवैध बालुवा उत्खननविरुद्ध सुरक्षाकर्मीले छापा मार्दा आठ वटा ट्रयाक्टरसहित चालकहरू नियन्त्रणमा परेका छन् ।
चन्द्रपुर ५ राजपैडा र वडा नं. ८ मोतीपुरस्थित चाँदी खोलामा अवैध रूपमा बालुवा उत्खनन भइरहेको सूचना पाएपछि सशस्त्र प्रहरीको टोली बिहीबार बिहान घटनास्थल पुगेको थियो । सुरक्षा बेस सन्तपुरबाट सशस्त्र प्रहरी नायब उपरीक्षक विश्वनाथ जिसीको नेतृत्वमा खटिएको टोलीले उत्खनन तथा ढुवानीमा प्रयोग भइरहेका ट्रयाक्टर नियन्त्रणमा लिएको हो ।
प्रहरीका अनुसार केही ट्रयाक्टर बालुवा लोड गरिरहेका थिए भने केही खाली अवस्थामा फेला परेका थिए । सो क्रममा आठै जना चालकलाई समेत नियन्त्रणमा लिइएको थियो ।
घटनापछि ट्रयाक्टर र चालकलाई चन्द्रपुर नगरपालिकामा बुझाइएको थियो । नगरपालिकाले भने सामान्य जरिवाना लिएर सबैलाई रिहा गरेको छ । राजश्व शाखाका अनुसार प्रति ट्रयाक्टर एक हजार रुपैयाँका दरले जरिवाना असुल गरिएको हो ।
यसैबीच नगरपालिकाले चालु आर्थिक वर्षका लागि नदीजन्य पदार्थ उत्खननको ठेक्का प्रक्रिया अघि बढाइसकेको भए पनि औपचारिक सम्झौता भने अझै बाँकी रहेको जनाएको छ । चाँदी खोला र बागमती नदी दुबैमा ठेक्का लागिसकेको र छिट्टै सम्झौता हुने तयारी भइरहेको अधिकारीहरूले बताएका छन् ।
