दिलिप पाण्डे रौतहट । करदाता सेवा कार्यालय रौतहटले प्रदान गर्दै आएका सम्पूर्ण सेवा अब रौतहटको सदरमुकाम गौरस्थित कोष तथा लेखा नियन्त्रक कार्यालयबाटै उपलब्ध हुने भएका छन्। कार्यालयले पान नम्बरसम्बन्धी सेवा औपचारिक रूपमा सुरु गरिसकेको जनाएको छ।
कोष तथा लेखा नियन्त्रक कार्यालय रौतहटका प्रमुख देवी गौतमका अनुसार यसअघि करदाता सेवा कार्यालयबाट हुँदै आएका सबै काम अब कोलेनिका मार्फत सञ्चालन हुनेछन्। पान नम्बर बनाउने, पानलाई स्तरवृद्धि गरी भ्याटमा रूपान्तरण गर्ने लगायतका सेवा कोलेनिकाबाटै प्रदान गरिनेछ।
कोलेनिकाबाट पहिलो पटक पान नम्बर लिने सेवाग्राही परोहा नगरपालिका वडा नम्बर ३ तेजापकड निवासी गजेन्द्र प्रसाद कुशवाहा रहेका छन्। उनलाई कोलेनिका कर्मचारी धमेन्द्र यादवले हस्ताक्षर गरी पान नम्बर प्रदान गरेका थिए।
पान नम्बर वितरण कार्यक्रममा कोष तथा लेखा नियन्त्रक कार्यालय रौतहटका प्रमुख देवी गौतम, करदाता कार्यालयका निमित्त कर अधिकृत रिमताल आचार्य, देवेन्द्र प्रसाद अधिकारी (देवी) तथा करदाता कार्यालयका कर्मचारी प्रमोद कुमार सिंहको उपस्थिति रहेको थियो।
