जनमत पार्टीका अध्यक्ष डा. सी. के. राउतले संसदीय राजनीतिबाट विश्राम लिने घोषणा गरेका छन्।
सोमबार एक वक्तव्य जारी गर्दै उनले पदको राजनीतिबाट टाढा रहे पनि पार्टीलाई आवश्यकता रहेसम्म नेतृत्व दिने र जनताका लागि संघर्ष गरिरहने बताए ।
डा. राउतले आफ्ना विगतका अनुभव साझा दुई पटक व्यक्तिगत इच्छा विपरीत संसदीय निर्वाचन लडेको उल्लेख गरेका छन्। २०७९ सालको निर्वाचनमा आफू नलड्ने विचार राख्दा पनि पार्टीलाई राष्ट्रिय पार्टी बनाउन साथीहरूको आग्रहमा उठ्नुपरेको र सो निर्णय सही सावित भएको उनले बताएका छन्।
त्यसै गरी, हालै सम्पन्न २०८२ को निर्वाचनमा पनि आफू उम्मेदवार नबन्ने पक्कापक्की भए पनि अन्तिम क्षणमा कार्यकर्ताको मनोबल गिर्न नदिन चुनावी मैदानमा उत्रिएको उनको भनाइ छ। “कतिखेर संसदीय र पदको राजनीतिबाट विश्राम लिऔँ भनेर मौका खोज्दाखोज्दै २०८२ को निर्वाचन नलड्ने पक्कापक्की थियो,” उनले भनेका छन्, “तर साथीभाइको सल्लाह मान्दै उठेर ठीक गरेछु भन्ने लाग्छ।”
आफूमा पदको लोभलालच नपलाओस् र मायाजालमा नअल्झिऊँ भन्ने उद्देश्यले सार्वजनिक रूपमै संसदीय राजनीतिबाट टाढा रहने निर्णय लिएको डा. राउतले स्पष्ट पारेका छन्। उनले भनेका छन्, “यसको मतलब राजनीतिबाट गायब भएको होइन। राजनीतिमा सक्रिय रहँदै, आफ्नो सिद्धान्त र एजेन्डालाई निरन्तर अगाडि बढाउँदै जनताको सेवामा रहने नै छु।”
आगामी स्थानीय र प्रदेश निर्वाचनका लागि पार्टीलाई तयारी गराउन आफू प्रतिबद्ध रहेको र अधिकार एवं पहिचानको लडाइँमा सदैव जनताको साथमा रहने उनले बताए। उनले आफ्नो सन्देशको अन्त्यमा दुष्यन्त कुमारको चर्चित शेर उद्धृत गर्दै ‘आगो बलिरहनुपर्ने’ भाव व्यक्त गरेका छन्।
