दिलीप पाण्डे रौतहट । रौतहटको माधव नारायण नगरपालिकाले आफ्नो क्षेत्रभित्र रहेका सार्वजनिक तथा सरकारी जग्गामा भइरहेको अतिक्रमण हटाउन ३५ दिने चेतावनी जारी गरेको छ । नगरपालिकाले वैशाख ७ गते सार्वजनिक सूचना प्रकाशित गर्दै सार्वजनिक सम्पत्तिको संरक्षण तथा व्यवस्थापनका लागि यस्तो निर्णय लिइएको जनाएको हो । सूचनाअनुसार सडक, खोला, नाला, ऐलानी, पर्ती, पार्क तथा खुला क्षेत्रलगायतमा अवैध रूपमा बनाइएका घर, टहरा, घेरा वा अन्य संरचना तोकिएको समयभित्र स्वेच्छाले हटाउन आग्रह गरिएको छ ।
नेपाल सरकार मन्त्रिपरिषद्बाट स्वीकृत शासकीय सुधार सम्बन्धी एक सय कार्यसूची अन्तर्गतको बुँदा कार्यान्वयनका लागि संघीय मामिला तथा सामान्य प्रशासन मन्त्रालयको निर्देशनपछि यो अभियान अघि बढाइएको नगरपालिकाले जनाएको छ । नगरपालिकाले निर्धारित ३५ दिनभित्र अतिक्रमण नहटाइएमा आफैं हटाउने र सो क्रममा लाग्ने सम्पूर्ण खर्च सम्बन्धित अतिक्रमणकर्ताबाट असुल गरिने स्पष्ट पारेको छ ।
नगर प्रमुख बैजनाथ प्रसाद यादवले सार्वजनिक सम्पत्तिको संरक्षणमा सबै सरोकारवालाको सहयोग आवश्यक रहेको भन्दै समयमै अतिक्रमण हटाउन आग्रह गरेका छन् ।
