दिलिप पाण्डे रौतहट । रौतहटको गौर नगरपालिका ६ सबगढामा नागरिक समाजको अगुवाइमा सोमबार बिहान शान्ति सद्भाव र्याली निकालिएको छ। केही दिनदेखि दुई समुदायबीचको विवादका कारण तनावग्रस्त बनेको क्षेत्रमा शान्ति र सद्भाव कायम गर्ने उद्देश्यले र्याली आयोजना गरिएको हो।
सबगढाको मुख्य सडकबाट सुरु भएको र्यालीले प्रभावित बस्तीहरू परिक्रमा गर्दै आपसी भाइचारा, सहिष्णुता र संवादमार्फत समस्या समाधान गर्नुपर्ने सन्देश प्रवाह गरेको थियो। र्यालीमा विभिन्न राजनीतिक दलका स्थानीय प्रतिनिधि, समाजसेवी, धार्मिक अगुवा, युवा तथा सर्वसाधारणको उल्लेख्य सहभागिता रहेको थियो। प्रशासनका प्रतिनिधिहरू पनि र्यालीमा सहभागी भएका थिए।
सहभागीहरूले हिंसा र उत्तेजनाबाट कुनै पनि समस्या समाधान नहुने भन्दै संयमता अपनाउन सबै पक्षलाई आग्रह गरेका छन्। पछिल्ला घटनाले स्थानीय स्तरमा त्रास र अन्योल सिर्जना गरेको उल्लेख गर्दै अब यस्ता घटना दोहोरिन नदिन सबै समुदाय एकजुट हुनुपर्नेमा जोड दिइयो।
यसैबीच जिल्ला प्रशासन कार्यालय रौतहट ले आज बिहान ६ बजेदेखि लागू रहेको कर्फ्यु आदेश हटाएको जनाएको छ। प्रशासनले सुरक्षा अवस्थाको समीक्षा गर्दै अवस्था क्रमशः सामान्य बन्दै गएको निष्कर्षसहित कर्फ्यु हटाउने निर्णय गरेको हो। यद्यपि, शान्ति सुरक्षा कायम राख्न सुरक्षाकर्मीको उपस्थिति भने यथावत राखिएको बताइएको छ।
गत केही दिनदेखि गौर क्षेत्रमा दुई समुदायबीचको विवाद चर्किँदा झडप र ढुंगामुढा भएको थियो। स्थिति नियन्त्रणबाहिर जान सक्ने देखिएपछि प्रशासनले कर्फ्यु जारी गरेको थियो। कर्फ्युका कारण बजार, शैक्षिक संस्था तथा सार्वजनिक सेवा प्रभावित बनेका थिए।
स्थानीय बासिन्दाले अब अवस्था सामान्यतर्फ फर्किन थालेको प्रतिक्रिया दिएका छन्। उनीहरूले स्थायी समाधानका लागि समुदायस्तरमै संवाद र समन्वय आवश्यक रहेको बताएका छन्।
र्यालीमार्फत सबै पक्षले सामाजिक सद्भाव कायम राख्दै विकास र शान्तिको मार्ग रोज्नुपर्ने सन्देश दिएका छन्। प्रशासनले पनि अफवाहमा नलाग्न र सामाजिक सञ्जालमा भ्रामक सामग्री नफैलाउन सर्वसाधारणलाई अनुरोध गरेको छ।
