दिलिप पाण्डे रौतहट । करदाता सेवा कार्यालयबाट सामान लुकीछिपी रूपमा अन्यत्र लैजान खोजिएको विषयमा विवाद उत्पन्न भएपछि स्थानीय व्यापारीहरू आन्दोलनमा उत्रिएका छन् । ट्रकमा लोड गरिएको सामग्री बाटोमै अवरोध भएपछि पुनः कार्यालयमै फिर्ता अनलोड गरिएको छ ।
घटनापछि रौतहट उद्योग वाणिज्य संघ का पदाधिकारी तथा व्यापारीहरूले बजार बन्द गराउँदै विरोध प्रदर्शन सुरु गरेका छन् । कार्यालय आफ्नै भवनमा सञ्चालन भइरहेका बेला सिमरा तर्फ सार्ने प्रयास गरिएको भन्दै उनीहरूले आपत्ति जनाएका हुन् ।
विरोधका क्रममा व्यापारी र स्थानीय युवाहरू ट्रक अगाडि बसेका थिए । स्थिति तनावपूर्ण बनेपछि सुरक्षाकर्मी परिचालन गरिएको थियो । घण्टाघर चोक क्षेत्रमा टायर बालेर प्रदर्शनसमेत गरिएको बताइएको छ ।
स्थानीय राजनीतिक दलका नेताहरूले पनि निर्वाचनको मुखमा कार्यालय सार्ने प्रयास अनुपयुक्त भएको बताएका छन् । नेपाल कम्युनिष्ट पार्टी (एमाले) र राष्ट्रिय स्वतन्त्र पार्टी का प्रतिनिधिहरूले निर्णय फिर्ता लिन माग गरेका छन् । व्यापारीहरूले समस्या समाधान नभएसम्म आन्दोलन जारी रहने चेतावनी दिएका छन् ।
