रौतहट। नेपाली काँग्रेसका नेता रामेश्वर प्रसाद यादवले पार्टी परित्यागको घोषणा गरेका छन्। जेन–जीको भावना अनुरूप क्षेत्रीय समितिले सिफारिस गरेका उम्मेदवारलाई बेवास्ता गर्दै पार्टी नेतृत्वले अन्य पार्टीबाट आएका व्यक्तिलाई टिकट दिएको आरोप लगाउँदै यादवले काँग्रेस छोड्ने निर्णय गरेका हुन्।
आइतबार रौतहट सदरमुकाम गौरस्थित आफ्नै निवासमा आयोजित पत्रकार सम्मेलनमार्फत यादवले नेपाली काँग्रेसको साधारण सदस्य समेत नरहने गरी पार्टी परित्याग गर्दै बालेन्द्र साहको नेतृत्वमा चुनाव लडिरहेका उम्मेदवारलाई खुलेर समर्थन गर्ने घोषणा गरे।
यादवले २०४६ सालको जनआन्दोलनमा सक्रिय भूमिका निर्वाह गर्नुका साथै २०४८ र २०५१ सालको निर्वाचनमा नेपाली काँग्रेसका उम्मेदवारलाई जिताउन महत्वपूर्ण योगदान दिएको दाबी गरे। फागुन २१ मा हुने प्रतिनिधि सभा निर्वाचनका लागि क्षेत्र नं. १, रौतहटबाट चार जनाको नाम सिफारिस गरिएकोमा आफ्नो नाम समेत समावेश भए पनि पार्टी नेतृत्वले सिफारिसलाई बेवास्ता गरेको उनको आरोप छ।
क्षेत्रीय समितिको निर्णय विपरीत सद्भावना पार्टीका अध्यक्ष अनिलकुमार झालाई टिकट दिइनु काँग्रेसको लोकतान्त्रिक परम्पराविरुद्ध भएको यादवको भनाइ छ। आफ्नो भूमिकाको मूल्याङ्कन नगरिएको भन्दै अब पार्टीमा रहन आवश्यक नरहेको उनले स्पष्ट पारे।
