दिलीप पाण्डे रौतहट । जनता समाजवादी पार्टी नेपाल (जसपा)ले प्रतिनिधिसभा निर्वाचनलाई लक्षित गरि रौतहटको सदरमुकाम गौरमा चुनावी सम्पर्क कार्यालय उद्घाटन गरेको छ । क्षेत्रीय चुनावी गतिविधि तीव्र बनाउने उद्देश्यले स्थापना गरिएको उक्त कार्यालयबाट अब संगठित रूपमा प्रचार–प्रसार र जनसम्पर्क अभियान सञ्चालन गरिने पार्टीले जनाएको छ ।
कार्यालय उद्घाटन कार्यक्रममा बोल्दै रौतहट क्षेत्र नम्बर १ का प्रतिनिधिसभा उम्मेदवार योगेन्द्र यादवले क्षेत्रका लागि आफ्ना प्रमुख चुनावी प्राथमिकताहरू सार्वजनिक गरेका छन् । उनले जसपा नेपाल स्पष्ट एजेन्डा, फरक राजनीतिक पहिचान र जनताका वास्तविक समस्यामा केन्द्रित कार्यक्रमसहित चुनावमा सहभागी भएको बताए । यादवले पार्टी अध्यक्ष उपेन्द्र यादव तथा वरिष्ठ नेता महन्थ ठाकुरको नेतृत्वमा देशमा स्वाभिमान, सम्मान र समानतामूलक राजनीतिक व्यवस्था स्थापनाका लागि पार्टी निरन्तर संघर्षरत रहेको उल्लेख गरे । उनले परम्परागत नाराभन्दा परिणाममुखी काममार्फत जनताको विश्वास जित्ने लक्ष्य रहेको बताए ।
उम्मेदवार यादवका अनुसार क्षेत्र नम्बर १ को पहिलो प्राथमिकता बाढी नियन्त्रण हो । पूर्वतर्फ बागमती नदी, पश्चिमतर्फ लालबकैया नदी र बीचमा पर्ने झाँझ नदीका कारण वर्षेनी हुने डुबान र कटानले ठूलो क्षति पुग्दै आएको भन्दै उनले तटबन्ध मर्मत, सुदृढीकरण तथा नयाँ संरचना निर्माणलाई विशेष योजनासहित अगाडि बढाइने बताए । बाढी समस्याको स्थायी समाधानका लागि संघीय तहबाट आवश्यक बजेट र प्राविधिक सहयोग सुनिश्चित गर्ने प्रतिबद्धता उनले व्यक्त गरे ।
दोस्रो प्राथमिकतामा शिक्षा क्षेत्र सुधारलाई राखिएको उनले बताए । संघीय राजधानी नजिकैको क्षेत्र भएर पनि शिक्षा प्रणाली अपेक्षाअनुसार सुदृढ हुन नसकेको टिप्पणी गर्दै उनले विद्यालयको भौतिक पूर्वाधार, शिक्षण गुणस्तर र पाठ्यक्रम सुधारमा ध्यान दिइने बताए । युवामुखी, सीपमा आधारित र रोजगारीसँग जोडिएको शिक्षा प्रणाली विकास गर्ने योजना रहेको उनको भनाइ थियो ।
तेस्रो प्राथमिकताका रूपमा रोजगारी सिर्जनालाई अघि सार्दै यादवले क्षेत्र नम्बर १ मा आधुनिक उद्योग स्थापना गरी कम्तीमा १० हजार रोजगारी सिर्जना गर्ने लक्ष्य लिएको जानकारी दिए । बेरोजगारीका कारण ठूलो संख्यामा युवाहरु बिदेश जान बाध्य भएको अवस्थालाई अन्त्य गर्न स्थानीय स्तरमै उद्योग, कृषि आधारित प्रशोधन केन्द्र र साना–मझौला उद्यम प्रवद्र्धन गरिने उनले बताए । लगानी आकर्षित गर्न निजी क्षेत्रसँग सहकार्य गरिने पनि उनले स्पष्ट पारे ।
चौथो प्राथमिकतामा सामाजिक न्याय र विभेद अन्त्यको विषयलाई जोड दिँदै उनले जातीय विभेद, छुवाछूत तथा दलित, मुस्लिम र सीमान्तकृत समुदायमाथि हुने भेदभाव अन्त्य गर्न ठोस पहल गरिने बताए । समान अधिकार र अवसर सुनिश्चित गर्दै सम्मानजनक जीवनका लागि नीतिगत र कानुनी सुधारमा पहल गरिने उनको भनाइ थियो ।
यादवले धर्म, जात, वर्ग र सामाजिक स्तरका आधारमा हुने विभाजन अन्त्य गर्दै समावेशी र न्यायपूर्ण समाज निर्माण जसपा नेपालको मूल लक्ष्य रहेको दोहो¥याए । विकासलाई केवल पूर्वाधारमा सीमित नराखी सामाजिक रूपान्तरणसँग जोडेर अघि बढाइने उनले बताए । उद्घाटन कार्यक्रममा पूर्व प्रदेशसभा सदस्य बाबुलाल साह, पूर्व सभासद निलम वर्मा, वरिष्ठ मधेशी नेता श्रीमन नारायण मिश्रलगायत नेताहरूले पनि मन्तव्य राखेका थिए । वक्ताहरूले क्षेत्रीय विकास, समावेशी प्रतिनिधित्व र जनअधिकारका मुद्दामा जसपाले निरन्तर आवाज उठाउँदै आएको बताएका थिए । जिल्ला अध्यक्ष भरत साहको अध्यक्षतामा सम्पन्न कार्यक्रममा ठूलो संख्यामा नेता, कार्यकर्ता र समर्थकको उपस्थिति रहेको थियो । कार्यालय उद्घाटनसँगै क्षेत्र नम्बर १ मा जसपा नेपालको चुनावी अभियान औपचारिक रूपमा विस्तार भएको आयोजकले जनाएको छ ।
