मान्म (कालीकोट)। कालीकोटको शुभकालिका गाउँपालिका–४ सल्लेरीमा शुक्रबार बेलुकी करिब ६ बजे जीप दुर्घटना हुँदा तीन जनाको मृत्यु भएको छ।
सेरी–पान्तडी सडकखण्ड अन्तर्गत सल्लेरीमा उकालो चढ्ने क्रममा भे१ज २८९८ नम्बरको जीप अचानक ब्याक भएर सडकबाट खस्दा दुर्घटना भएको हो। दुर्घटनामा दुई जना स्काभेटर अपरेटर र एक जना सहचालकको घटनास्थलमै मृत्यु भएको कालीकोटका प्रहरी प्रमुख हिमबहादुर खत्रीले जानकारी दिए।
मृत्यु हुनेमा दैलेखको आठबिस नगरपालिका घर भएका २८ वर्षीय शंकर कठायत, अछामका टेकेन्द्र शाही र कालीकोट शुभकालिका–२ का सहचालक नवराज शाही रहेका छन्। उनीहरू तीनै जना सेरी–पान्तडी सडक निर्माण कार्यमा संलग्न थिए।
प्रहरीका अनुसार जीप सडकबाट करिब ५०० मिटर तल तिला नदीको किनारमा खसेर टुक्राटुक्रा भएको अवस्थामा फेला परेको छ। भीरबाट तीनै जनाको शव निकालेर सडकमा ल्याइसकिएको छ भने परीक्षणका लागि आफन्तको उपस्थितिमा सदरमुकाम मान्म लैजाने तयारी भइरहेको प्रहरीले जनाएको छ।
दुर्घटनापछि जीप चालक प्रहरीको सम्पर्कमा आएको भए पनि विस्तृत सोधपुछ हुन बाँकी रहेको छ। घटनाको जानकारी पाउनासाथ प्रमुख जिल्ला अधिकारी गोर्कणराज सुयल, प्रहरी प्रमुख खत्रीसहित जनपद प्रहरी र सशस्त्र प्रहरीको टोली घटनास्थल पुगेको थियो।
