दिलीप पाण्डे रौतहट । पशुपन्छीमा फैलिने संक्रामक रोग नियन्त्रण तथा पशु उत्पादन वृद्धि गर्ने उद्देश्यले रौतहट जिल्लामा अभियान तीव्र रूपमा अगाडि बढाइएको छ । भेटेरिनरी अस्पताल तथा पशु सेवा विज्ञ केन्द्र रौतहटको आयोजनामा तथा सम्बन्धित स्थानीय तहका पशु सेवा शाखासँगको समन्वयमा अभियान सञ्चालन गरिएको हो ।
कार्यालयका अनुसार चैत ७ गतेदेखि १३ गतेसम्म खोप सप्ताह सञ्चालन हुँदैछ । यस अवधिमा जिल्लाका सबै पालिकामा पुगेर पशुपन्छीमा देखिने प्रमुख संक्रामक रोग विरुद्ध खोप लगाइँदैछ ।
अभियान अन्तर्गत गाई, भैंसी, पाडापाडी, बाच्छाबाच्छी तथा बङ्गुर÷सुगुरमा देखिने खोरेत (एफएमडी) रोग विरुद्ध खोप लगाउने कार्य भइरहेको छ । यसैगरी बाख्रा, भेडा, पाठापाठीमा देखिने पिपिआर (पिपिआर) रोग विरुद्ध खोप लगाउने तयारीसमेत गरिएको छ । खोरेत रोगले पशुमा खुट्टा तथा मुखमा घाउ आउने, ज्वरो आउने र उत्पादन क्षमतामा कमी ल्याउने भएकाले यसलाई नियन्त्रण गर्न खोप अभियान प्रभावकारी उपाय मानिन्छ ।
जिल्लाभर सञ्चालन भइरहेको अभियानका लागि ८७ जना जनशक्ति परिचालन गरिएको छ । कार्यालय प्रमुख इन्दु राय यादवका अनुसार अभियानको सुरुवाती लक्ष्य करिब ७५ हजार पशुमा खोप लगाउने रहेको छ । हालसम्म करिब ३५ प्रतिशत प्रगति भएको जनाउँदै उनले बाँकी अवधिमा अभियानलाई अझ तीव्र बनाइने बताए ।
उनले भने खोप अभियानलाई प्रभावकारी बनाउन स्थानीय तहसँग निरन्तर समन्वय भइरहेको छ । केही पालिकामा स्रोत तथा जनशक्तिको कमी चुनौतीका रूपमा देखिए पनि लक्ष्य हासिल गर्न हामी सक्रिय छौँ । हाल गाईभैंसीमा खोरेत रोग विरुद्ध खोप लगाउने कार्य प्राथमिकतामा राखिएको छ । यो अभियान सम्पन्न भएपछि जिल्लाभर बाख्रा तथा भेडामा पिपिआर खोप अभियान सञ्चालन गरिने योजना रहेको छ । कार्यालयका अनुसार रौतहट जिल्लामा मात्रै करिब २ लाखभन्दा बढी बाख्रामा पिपिआर खोप लगाउने लक्ष्य राखिएको छ ।
खोप अभियानले पशुमा लाग्ने महामारीजन्य रोग नियन्त्रण गर्नुका साथै कृषकको आम्दानी वृद्धि, दुग्ध तथा मासु उत्पादनमा सुधार ल्याउने अपेक्षा गरिएको छ । ग्रामीण क्षेत्रमा पशुपालन मुख्य आयस्रोतका रूपमा रहेकोले यस्ता अभियानले कृषकलाई प्रत्यक्ष लाभ पु¥याउने विश्वास गरिएको छ ।
यद्यपि अभियान सञ्चालनका क्रममा केही स्थानमा स्रोतको अभाव, जनशक्ति व्यवस्थापन तथा जनचेतनाको कमी जस्ता चुनौतीहरू देखिएका छन् । यस्ता समस्यालाई समाधान गर्न स्थानीय तह सरोकारवाला निकाय तथा कृषकबीच सहकार्य आवश्यक रहेको कार्यालयले जनाएको छ । खोप लगाएपछि केही पशुमा सामान्य ज्वरो आउने वा खोप लगाएको स्थानमा हल्का सुन्निने जस्ता साइड इफेक्ट देखिन सक्ने भए पनि यसले दीर्घकालीन रूपमा रोग नियन्त्रणमा ठूलो योगदान पु¥याउने चिकित्सकहरूले बताएका छन् ।
