काठमाडौं – विश्व फुटबलकै सबैभन्दा चर्चित प्रतिस्पर्धा एल क्लासिको अन्तर्गत बार्सिलोना र रियल मड्रिड आज भिड्दै छन्। स्पेनिस सुपर कप २०२६ को फाइनल खेल साउदी अरबको जेद्दाहस्थित किङ अब्दुल्लाह स्पोर्ट्स सिटी स्टेडियममा हुनेछ। खेल नेपाली समयअनुसार राति पौने १ बजे सुरु हुनेछ।
फाइनल खेललाई लिएर दुवै टोलीमा उच्च उत्साह देखिएको छ। पछिल्लो समय अपेक्षाअनुसार प्रदर्शन गर्न नसकेको रियल मड्रिड दबाबमा देखिएको छ भने बार्सिलोना आत्मविश्वासका साथ मैदान उत्रने तयारीमा छ।
गत सिजनको सुपर कप फाइनलमा बार्सिलोनाले रियल मड्रिडलाई पराजित गर्दै उपाधि जितेको थियो। सोही सफलता दोहोर्याउने लक्ष्यका साथ बार्सिलोना मैदानमा उत्रने छ।
बार्सिलोनाका प्रशिक्षक हान्सी फ्लिकले टोली पूर्ण आत्मविश्वासमा रहेको बताएका छन्। उता रियल मड्रिडका गोलरक्षक थिबाउट कोर्टुवाले एल क्लासिको केवल खेल मात्र नभई प्रतिष्ठा र उपाधिको लडाइँ भएको प्रतिक्रिया दिएका छन्।
