दोलखा । वैतेश्वर गाउँपालिकाको आयोजनामा सम्पन्न वडा स्तरीय शिक्षक–कर्मचारी भलिबल प्रतियोगिताको उपाधि आयोजक वैतेश्वर गाउँपालिका कर्मचारी टिमले जितेको छ।
शनिबारदेखि वैतेश्वर माध्यमिक विद्यालयको खेलमैदान नाम्दुमा सञ्चालन भएको प्रतियोगितामा सहभागी १० टिमलाई पछि पार्दै कर्मचारी टिम च्याम्पियन बनेको हो। विजेता टिमले नगद ३० हजार रुपैयाँसहित शिल्ड र मेडल प्राप्त गरेको छ।
प्रतियोगितामा वडा नम्बर–२ को शिक्षक टिम उपविजेता बन्दै नगद २० हजार रुपैयाँ हात पारेको छ भने वडा नम्बर–३ को शिक्षक भलिबल टिम तेस्रो हुँदै नगद १० हजारमा चित्त बुझाएको छ। वडा नम्बर–१ को शिक्षक टिमले सान्त्वना स्थान हासिल गर्दै नगद ५ हजार रुपैयाँ जितेको छ।
प्रतियोगितामा वैतेश्वर गाउँपालिकाका ८ वटै वडाका माध्यमिक सामुदायिक विद्यालयका शिक्षक टिम तथा गाउँपालिकाका दुई कर्मचारी टिम सहभागी थिए।
विजेता तथा उपविजेता टिमहरूलाई गाउँपालिकाका वडा अध्यक्षहरू अशोक तामाङ, श्यामकुमार घिसिङ, कमल अधिकारी तथा जिल्ला खेलकुद विकास समिति दोलखाका अध्यक्ष आशिष घिसिङलगायतले पुरस्कार वितरण गरेका थिए।
शिक्षक र कर्मचारीबीच आपसी परिचय र सहकार्यलाई बलियो बनाउने उद्देश्यले प्रतियोगिता आयोजना गरिएको आयोजकको भनाइ छ। विद्यालय नै खेलाडी उत्पादनको आधार भएकाले शिक्षकलाई खेलकुद गतिविधिमा सक्रिय बनाइ विद्यार्थीस्तरमा खेलकुद प्रवर्द्धन गर्ने लक्ष्य पनि कार्यक्रमको मुख्य उद्देश्य रहेको गाउँपालिका प्रवक्ता श्यामकुमार घिसिङले बताए।
