रौतहट / मधेश प्रदेश सभाका पूर्व प्रदेश सभा सदस्य नागेन्द्र प्रसाद सिन्हाको मंगलबार निधन भएको छ। नेपाली कांग्रेसबाट २०७४ सालको प्रदेश सभा निर्वाचनमा रौतहट क्षेत्र नं. २ (क) बाट निर्वाचित ७३ वर्षीय सिन्हाको उपचारका क्रममा काठमाडौँस्थित मेडिसिटी अस्पतालमा निधन भएको हो।
स्व. सिन्हा तत्कालीन प्रदेश नं. २ का प्रदेश सभा सदस्य हुनुहुन्थ्यो। साथै उहाँ रौतहटको साबिक औरैया गाविसका दुई कार्यकाल अध्यक्ष रहनुभएको थियो। ईशनाथ नगरपालिका वडा नं. २ निवासी सिन्हाको निधनसँगै रौतहटसहित मधेश प्रदेशभर शोकको वातावरण बनेको छ।
जीवनको अन्तिम समयसम्म समाज र क्षेत्रको सेवामा सक्रिय रहनु भएका सिन्हा सरल, मिलनसार तथा जनमुखी स्वभावका कारण स्थानीय तहदेखि प्रदेशस्तरसम्म लोकप्रिय नेता मानिनुहुन्थ्यो। सामाजिक विकास, जनसरोकार तथा क्षेत्रीय उत्थानका लागि उहाँले पुर्याउनुभएको योगदान उल्लेखनीय रहेको बताइएको छ।
उहाँको निधनप्रति विभिन्न राजनीतिक दल, सामाजिक संघ–संस्था तथा सर्वसाधारणले शोक व्यक्त गरेका छन्। स्व. सिन्हाप्रति सम्मान व्यक्त गर्दै ईशनाथ नगरपालिकाले भोलि सार्वजनिक बिदा दिएको छ।
