काठमाडौं । नेपाली कांग्रेसको जारी विशेष महाधिवेशनमा नयाँ नेतृत्व चयनका लागि मतदान नहुने सम्भावना देखिएको छ। उम्मेदवारको मनोनयन दर्ता प्रक्रिया सकिएको र नेतृत्व सर्वसम्मतिबाट चयन गर्ने प्रयास भइरहेको स्रोतले जनाएको छ।
सभापति पदमा महामन्त्री गगन थापाको मात्र उम्मेदवारी परेको छ। महामन्त्री पदका लागि विश्वप्रकाश शर्मा र प्रदीप पौडेलले उम्मेदवारी दर्ता गराएका छन्। विधानअनुसार महामन्त्री दुई जना हुने व्यवस्था छ। अन्य पदमा परेको उम्मेदवारीबारे निर्वाचन समितिले औपचारिक विवरण सार्वजनिक गर्न बाँकी छ।
स्रोतका अनुसार विशेष महाधिवेशनमा सकेसम्म मतदान गर्न नपरोस् भन्ने उद्देश्यले मनोनयन प्रक्रिया अघि बढाइएको हो। कुनै पदमा विधानले तोकेको संख्याभन्दा बढी उम्मेदवारी परेमा सहमतिमै फिर्ता गराई निर्विरोध चयन गर्ने तयारी गरिएको छ।
यसै क्रममा उम्मेदवारहरूबाट ‘आवश्यक परे उम्मेदवारी फिर्ता लिन तयार छु’ भन्ने व्यहोराको फाराममा हस्ताक्षर गराइएको छ। आवश्यकभन्दा बढी उम्मेदवारी परेमा महाधिवेशन हलबाट सहमतिका लागि म्याण्डेट लिइ आपसी सहमतिमै फिर्ता गराउने र सर्वसम्मत नेतृत्व चयन गर्ने व्यवस्था मिलाइने स्रोतले जानकारी दिएको छ।
