रौतहट । रौतहटको राजपुर नगरपालिका–१ स्थित मौलबी प्राथमिक विद्यालयमा आँखा उपचार तथा परामर्श शिविर सम्पन्न भएको छ। प्रदेशिक अस्पताल गौरका अध्यक्ष तथा समाजसेवी अवधेश प्रसाद यादवको विशेष पहलमा पीडित तथा सर्वसाधारणलाई लक्षित गर्दै शिविर आयोजना गरिएको हो।
रूइत फाउन्डेसनको आर्थिक सहयोग तथा नेपाल नेत्रज्योति संघ, गौर आँखा अस्पतालको आयोजनामा सञ्चालन गरिएको शिविरबाट ३२० जना स्थानीय नागरिक प्रत्यक्ष रूपमा लाभान्वित भएका छन्। सेवाग्राहीमध्ये १९६ महिला र १२४ पुरुष रहेका छन्।
शिविरमा आँखा परीक्षण, परामर्श सेवा, औषधि तथा चस्मा वितरण गरिएको थियो। १२८ जनालाई चस्मा र १७९ जनालाई औषधि निःशुल्क प्रदान गरिएको आयोजकले जनाएको छ। गम्भीर अवस्थाका बिरामीलाई थप उपचारका लागि गौर आँखा अस्पतालमा रिफर गरिएको छ।
कार्यक्रमका संयोजक सतेन्द्र पाण्डेका अनुसार शिविरमा छनोट भएका बिरामीहरूको गौर आँखा अस्पतालमा निःशुल्क शल्यक्रिया गरिनेछ।
शिविरमा गौर आँखा अस्पतालका नेत्र अधिकृत विनिता केशरी, अफ्ताब आलम दर्जी, दिनेश घिमिरे, शिवशंकर महतो, जितेन्द्र साह, प्रधुम्न यादवसहित ११ सदस्यीय प्राविधिक टोली सहभागी थियो।
