रौतहट । ललितपुरमा सम्पन्न ‘मिसेज भोग नेपाल’ सीजन–३ को ग्राण्ड फिनालेमा रौतहटकी ऋचा रानी राम ‘मिसेस भोग नेपाल टुरिजम २०२६’ घोषित भएकी छन्। विवाहित महिलाहरूको प्रतिभा र नेतृत्व क्षमता उजागर गर्ने उद्देश्यले आयोजित प्रतियोगिता हाउस अफ फेसन नेपाल ले सञ्चालन गरेको हो।
ललितपुरको म्याजेस्टिक ग्राण्ड मा आयोजित कार्यक्रममा देशका विभिन्न जिल्लाबाट २१ जना विवाहित महिला प्रतिस्पर्धी सहभागी भएका थिए। प्रस्तुति, आत्मविश्वास, व्यक्तित्व, सामाजिक दृष्टिकोण र समर्पणका आधारमा निर्णायक मण्डलले विजेता घोषणा गरेको आयोजकले जनाएको छ।
ग्राण्ड फिनालेका क्रममा प्रतिस्पर्धीहरूले विभिन्न चरणमा र्याम्प वाक गर्दै परम्परागत तथा आधुनिक पहिरनमा आफ्नो प्रस्तुति दिएका थिए। मधेस प्रदेशबाट दुई जनाको सहभागिता रहेकोमा उपाधि जित्न ऋचा रानी राम सफल भएकी हुन्।
कार्यक्रममा अघिल्लो सिजनका विजेताहरू सञ्जु श्रेष्ठ, रुथ सिवाकोटी तथा श्वेता बज्राचार्यको उपस्थिति रहेको थियो। उनीहरूले यस्ता मञ्चले विवाहित महिलालाई घरपरिवारसँगै सामाजिक र व्यावसायिक क्षेत्रमा अघि बढ्न प्रेरणा दिने बताएका थिए।
विवाहित महिलाको आत्मविश्वास वृद्धि, व्यक्तित्व विकास र समाजमा सक्रिय सहभागिता सुनिश्चित गर्ने लक्ष्यसहित प्रतियोगिता आयोजना हुँदै आएको आयोजकको भनाइ छ।
