मुम्बई । फिल्म ‘धुरन्धर’ प्रदर्शनमा आएको एक महिना बितिसक्दा पनि बक्स अफिसमा राम्रो पकड कायम राख्न सफल भएको छ। फिल्मको सफलतासँगै यसका कलाकारहरूको लोकप्रियता पनि उल्लेख्य रूपमा बढेको देखिएको छ।
फिल्मले रणवीर सिंह र अक्षय खन्नालाई मात्र होइन, अभिनेत्री सारा अर्जुनलाई पनि ठूलो फाइदा पुर्याएको छ। यही कारण उनी यस हप्ता आइएमडीबीको लोकप्रिय भारतीय सेलिब्रेटी सूचीको पहिलो स्थानमा पुगेकी छन्। यस क्रममा उनले प्रभास र थलपति विजयजस्ता चर्चित स्टारलाई समेत पछि पारेकी छन्।
आइएमडीबीले सार्वजनिक गर्ने साप्ताहिक लोकप्रियता र्याङ्किङ विश्वभरका लाखौँ प्रयोगकर्ताको पेज भ्यु र इन्गेजमेन्टका आधारमा तय गरिन्छ।
गत हप्ता दोस्रो स्थानमा रहेकी सारा अर्जुन यस पटक एकै फड्कोमा शीर्ष स्थानमा उक्लिएकी हुन्। उनले थलपति विजय, प्रभास र अगस्त्य नन्दालगायत कलाकारलाई उछिनेकी छन्। उनको यो उपलब्धिको मुख्य श्रेय फिल्म ‘धुरन्धर’को सफल प्रदर्शनलाई दिइएको छ।
